Peqqussutissatut siunnersuummut nassuiaatit

 

Nassuiaatit nalinginnaasut

 

Namminersornerullutik Oqartussat kommunillu inissiaataasa attartortittakkat allanngortinneqarnissaat pillugu inatsisartut peqqussutissaattut siunnersuut namminerisamik iniutillit amerlanerulersinneqarnissaannik anguniagaqarnermut ilaavoq. Peqqussutissatut siunnersuut saqqummiunneqarpoq pilersaarummut "Attartortumiit Piginnittumut" atatillugu kommunit inissiaatiminnik attartortittakkanik tunisinissaminnik kissaateqarnerat aammalu innuttaasut inissianik maannakkut attartukkaminnik pigisatut inissianngortitsiniarlutik pisinissaminnik kissaateqarnerat naammassisinnaajumallugit.

Peqqussutissatut siunnersuummi tunngavissaatitaavoq pilersaarummut "Attartortumiit piginnittumut" kommunalbestyrelsip inissiaatiminik tunisinissaminik kissaateqartup imaluunniit pisortat inissiaataanni attartortittakkani najugaqartut soqutiginnittuunissaat. Kiisalu siunnersuummi tunngavissaatitaavoq kommunalbestyrelsip inissiaqarfimmi inissiaatiminik tulleriiaartumik tunisisinnaanissaa, t.i. inissiat ataasiakkaarlugit. Illuatungaani attartortut inigisaminnik tigusinissaminnik kissaatigisaqartut inissiaqarfinni ataasiakkaani attartortut amerlanerussuteqartut inigisaminnik pisinissaminnik soqutiginnittuussapput inissiaqarfik tamarmiulluni allanngortinneqarsinnaassappat.

Pisortat inissiaqarfiutaata attartortittakkap pigisatut inissiaqarfinngorlugu agguataarneqarnissaa allanngortinneqarnissaalu akisujaartorujussuuvoq, tamaattumik suliniut kommunalbestyrelsimiit, tamatumani akissaajaatinut aningaasartuuteqaqqaartussamit, imaluunniit attartortuni amerlanerussuteqartuniit aallartinneqartariaqarpoq, taamaalilluni takutinneqassammat akissaajaatit kingusinnerusukkut inissiat tunineqarnerisigut matussuserneqarsinnaasut.

Peqqussutissatut siunnersuummi aalajangersakkat arlallit inissianik tunisinermi imaluunniit inissiat ataasiakkaarlugit tuniniarneqarnerannut atatillugu aningaasatigut pisussaaffiuleratarsinnaasut allaffissornikkullu pisarioqutissat aqqusaagassat kommunimit eqqarsaatersorfigeqqissaarneqarnissaat siunertaralugu immikkut suliarineqarput.

Naalakkersuisut naliliipput inissiaqarfiutini kommunip allanngortittariaqanngikkai attartortut minnerpaamik affaasa inigisaminnik tigusinissaq soqutigalugu takutinngikkaangassuk. Taamaattoqanngippammi inissiaqarfimmi allanngortinneqartumi inissiat nammineq pigisat ikinnerussuteqassapput inissiat attartortittakkat pisortanit pigineqartut amerlanerussuteqartut.

Inissiaqarfik ataatsimoortuulluni tunniunneqassaaq, taamaalilluni inissiaqarfimmik piginnittut peqatigiiffiat aallartinneqassaaq aammalu inissiaqarfiup atorneqarnissaa, pilersuinikkut atortuutit ataatsimoorussat inissiaqarfiullu eqqaani attavinnut akisussaaneq pillugit isumaqatigiissusiortoqassalluni. Ataatsimut isigalugu inissiaqarfimmi ataatsimi piginnittut assigiinngitsuunissaat pitsaasuunngilaq, tassami piginnittut attartortullu inissiaqarfiup aningaasaqarneranut aserfallatsaaliugaaneranullu tunngasuni assigiinngitsunik soqutigisaqartuussammata taamaattumillu assortuussutissaqartuassalluni.

Taamaattumik inissiamik piginnittoq tassaaguni Namminersornerullutik Oqartussat kommuniluunniit inissiani attartortunit suli najugarineqartuni pisortatut attartortitsisuusariaqarpoq attartortullu Namminersornerullutik Oqartussat kommunillu inissiaqarfiutaanni attartortittakkani ineqarnermut akiliutit naatsorsorneqartarnerat pillugu maleruagassat sukkulluunniit atuuttut malillugit ineqarnermut akiliutissat akilertassavaat.

Inissiaqarfiup attartortunit pisiarineqannginnerani piginnittup, t.i. Namminersornerullutik Oqartussat imaluunniit kommunalbestyrelsip, isumagissavaat inissiaqarfiup agguataarneqarnissaa landinspektørimillu uuttortaavigineqarnissaa, tassa inissiaqarfimmi inissiat ataasiakkaat aamma inissiaqarfimmi ataatsimoorussat, taamaaliornikkut inissiaqarfimmi inissiat ataasiakkaat pisiarinerannut akiliutaasussat tamarmiusut naatsorsorneqarsinnaaniassammata.

Taamaasinerani inissiat pisortanit pigineqarlutik attartortittagaajunnaarlutik pisortanit pigineqarlutik pigisatut inissianngorput attartorneqarunnaarnissamillu tungaanut inissiatut attartortittakkatut atorneqassallutik, attartorneerukkunik ammasumik tuniniarneqassallutik. Inissianik erngerlutik tunineqanngitsunik attartortut inissianik attartorneq pillugu inatsisartut peqqussutaanni pineqartunut suli ilaassapput.

Kiisalu inissiaqarfinni imaluunniit najugaqatigiiffinni ataasiakkaani piginnittut peqatigiiffiat pilersinneqassaaq, piginnittut peqatigiiffiata ingerlanissaalu ileqqoreqqusaliuunneqassallutik, taamaalilluni inissiaqarfik ataatsimoortoq tassanilu inissiat pineqartut pillugit ileqqoreqqusat allattorsimaffii Nunatta Eqqartuussiviani nalunaarsorneqarsinnaaniassammata. Ileqqoreqqusani aamma aalajangersaavigineqassapput inissiaqarfiup ataatsimoortup aammalu ataatsimoorussat ingerlanneqarnerannut il.il. piginnittut ataasiakkaat akileeqataassutissaat.

Piginnittut ataasiakkaat aamma piginnittut peqatigiiffiata pisinnaatitaaffii pisussaaffiilu aammalu inissianik ataatsimoorussanillu, matumanittaaq inissiaqarfiup inissiallu ataatsimoorussamik immikkuutaarlutillu atortulersuutaat, kiassaateqarfiat, kiammik pilersuiffiat, ataatsimoorussat il.il., pillugit maleruagassiat ileqqoreqqusani aalajangersarneqassapput.

Tamakku saniatigut piginnittut isumagisariaqarpaat inissiat ataasiakkaat tunineqarnissaasa pilersaarusiornissaat, taakkununnga ilanngullugit inissiaqarfik aammalu teknikikkut aningaasanullu tunngasut pillugit paasissutissat naleqquttut pisariaqartullu suliarineqarnissaat, taamaalillutik attartortut pisisinnaanerminnut tunngasut paaseqqissaarlugillu kingunerisinnaasaat nalilersorsinnaaniassammatigit.

Peqqussutissatut siunnersuut isummerfigeqqusissutigineqarsimavoq ukununnga A/S Inissiaatileqatigiiffik INI, KANUKOKA, SIK, GA, Grønlandsbanken A/S, Sparbank Vest, Nuup Kommunia, Aningaasaqarnermut Pisortaqarfik aamma Aqutsinermut Pisortaqarfik. Siunnersuut aaqqiissuteqarfigineqarpoq isummerfigeqqusissutinut akissutit takkussimasut mianeralugit.

Peqqussutissatut siunnersuut una Inatsisartut Inatsisissanik Nalilersuisarfianit tamanna pillugu allakkiorsimasumit misissuataarneqarsimavoq. Inatsisartut Inatsisissanik Nalilersuisarfiata teknikimut tunngasunik oqaaseqaatai siunnersuummi ilanngussuunneqarput isumaliutersuutit naalakkersuinermut tunnganerusut tusaatissatut tiguneqarlutik.


Peqqussutissatut siunnersuutip allaffissornikkut kingunerisassai

Peqqussutissatut siunnersuutip kingunerissavaa inissiaqarfiit inissiallu allanngortitsinermi pineqartunut ilaasut tamarmik teknikikkut aningaasatigullu naliliivigineqarnissaat. Naatsorsuutigisariaqarpoq suliassap suliarineqarnerata ukiup affaaniit ukiut aappaa avillugu sivisussuseqarsinnaanera, tassani suliassap, tassa teknikikkut aningaasatigullu misissuiffigineqarnera inissiaqarfiillu ataasiakkaat allaaserineqarnerat paasissutissanillu katersuineq, qanoq suliassartaqartiginera apeqqutaalluni.

Kommunalbestyrelsip inissiaatini attartortittakkat tunippagit inissiaqarfik taamalu inissiat ataasiakkaat piginnittut peqatigiiffianni ataatsimoorussami ilaasortaalissapput. Inissiat ataasiakkaarlugit tunineqarpata inissiat attartortumit suli najugarineqartut ingerlatsineq eqqarsaatigalugu najugaqaqatigiiffimmut inissiaqarfiup inissisimaffigisaanut atassapput. Attartortup ineqarnermut akiliutissai najugaqaqatigiiffiup taassuma ingerlatsinermut aserfallatsaaliuinermullu akissaajaatai tunngavigalugit naatsorsorneqarlutillu aalajangersarneqassapput. Taamaattumik piginnittut (kommunalbestyrelsip) piginnittut peqatigiiffiannut akissaajaatai aamma akissaajaatinut attartortup ineqarnermut akiliutimigut akilertagai naapertuuttariaqanngillat.

Inissiaqarfimmi Namminersornerullutik Oqartussanit pigineqartumi attartortut sisamararterutaasa pingasut inissiat attartukkatik pigisatut inissianngortillugit pisiarinissaat kissaatigippassuk sinneruttullu sisamararterutaasa ataatsip attartortuuinnarnissartik kissaatigippassuk peqatigiiffiit marluk pineqalissapput. Attartortut sinneruttut inissianik attartorneq pillugu Inatsisartut peqqussutaanni pineqartunut ilaaginnarnermikkut attartortutut pisinnaatitaaffiit pigiinnassavaat, taamaattumik Namminersornerullutik Oqartussat A/S Inissiaatileqatigiiffik INI piumaffigisariaqarpaat attartornerit taakku aqutsivigeqqullugit. Inissiaqarfinnut akuleriinnit pigineqartunut immikkut akissaajaataasinnaasut attartortunit pisussaaffigineqanngillat inissianillu piginnittumit aningaasartuutigineqassallutik.

Inissiaqarfik attartortittagaq pigisatut inissiaqarfimmut kommunalbestyrelsip allanngortippagu maannakkut attartortuusut tamarmik piginnittuulinnginnissaat naatsorsuutigisariaqarpoq. Taamaalillutik attartortut taakku kommunalbestyrelsi attartortitsisoralugu najugaqaannalissapput. Najugaqaqatigiiffik pisortanit pigineqartoq mikineruleriartuaassaaq inissiat attartortittakkat ataasiakkaat attartorneerukkiartuaarnerisigut ammasumik akiliuteqarumanerpaamut tunineqartarnerisigut.

Naatsorsuutigisariaqarporli taamaaliartuaarnissaata ukiorpassuarni ingerlanissaa aammalu allaffissornikkut aningaasatigullu pisariusuunissaa. Inissiat ataasiakkaaarlugit tuniniarneqartarnissaat Ineqarnermut, Attaveqarnermut Pilersuinermullu Naalakkersuisoqarfiup nangaasaarutigisimavaa kaammattuutigaluguli allanngortitsisoqannginnerani inissiaqarfimmi attartortut ikinnerpaamik sisamararterutaasa pingasut imminnut pisussaaffilernissaat. Taamaakkaluartoq inissiat ataasiakkaarlugit nioqqutigineqarnissaat Nuup Kommuniata kissaatigineruaa, periutsillu taassuma atorneqarnissaa KANUKOKA-p tapersersimavaa.


Peqqussutissatut siunnersuutip aningaasatigut kingunerisassai

Ineqarnermut, Attaveqarnermut Pilersuinermullu Naalakkersuisoqarfiup aningaasalersuisartullu eqqoriaaneri tunngavigalugit naatsorsuutigineqarpoq inissiat 375-it (30.000 m2) ukiuni tallimani siullerni nuna tamakkerlugu tunineqarsinnaasut, tamakku tassaallutik ilaqutariinnut ataatsinut illuliat, illut marloqiusat, illut tulleriiaat aammalu inissiaqarfiit quleriiaat mikinerusut. Tamatumanili soqutiginninneq, avataaniit aningaasalersuisoqarnissaanut periarfissat aningaasatigullu naalakkersuinikkut ingerlatsineq apeqqutaassapput.

Pisinermi akiliutaasussap m2-mut ataatsimut agguaqatigiissillugu 13.000 kr.-it missaanniinnissaa tunngavissaatillugu peqqussutissatut siunnersuutip nassatarissavaa pisinermi akiliutaasut tamarmiusut 390 mio. kr.-it missaanniinnissaat. Taakkunannga 60 %-it missaat imaluunniit 234 mio. kr.-it pisisup massakkorpiaq akiliutaanit pissarsiarineqassapput. Sinneruttut 40 %-it imaluunniit 156 mio. kr.-it tunisisumit aningaasalersorneqassapput taarsigassarsiarititatut ukiut 15 qaanngiunneranni aatsaat akilersulerneqartussatigut.

Ukiumoortumik aningaasat nalikilliartornerat 2 %-iusoq naatsorsuutigigaanni 156 mio. kr.-init taakkunannga ukiuni 15-ini erniaqaratik uninngasunit pisinermi akiliummut 10,5 %-it massakkorpiaq tapiissutigineqarnerannut naapertuuppoq.

30.000 m2-it taakku sananeqarneranni akissaajaatit m2-mut ataatsimut 11.500 kr.-iusut, t.i. 345 mio. kr.-it, naatsorsuutigigaanni piginnittut aningaasaliissutiminnit iluanaarutissat 1,5 % 5,2 mio. kr.-inut naapertuuttut ukiumut annaasassavaat.


Naggasiutitut nassuiaatit isumaliutillu

Kommunalbestyrelsit inissiaatiminnik attartortittakkanik attartortunut inissiat ataasiakkaarlugit tunisinissamut periarfissaat Ineqarnermut, Attaveqarnermut Pilersuinermullu Naalakkersuisoqarfiup isumaliutersorfigisimavaa. Naalakkersuisoqarfik isummersimavoq toqqissisimanarnerpaassasoq inissiat tiguneqarnissaannik soqutiginninneq attartortut namminneq isumaliutersornerisa suliniuteqarnerisalu kingunerippassuk.

Nuup Kommuniata inissiaataani attartortittakkani Fiskerbymiittuni najugaqaqatigiit siulersuisui 2001-imi novembarip qaammataani ilaasortami 80-iusut akornanni inigisaminnik tigusinissamut soqutiginninneq misissuiffigaa. Tamatuma inerneraa aperineqartunit 80-init 34 akissuteqarnerat. Taakkunannga 27 soqutiginnipput arfineq-marluk soqutiginninngitsut. Attartortut 46 akissuteqanngillat. Najugaqaqatigiit siulersuisuisa misissuineq ima inernilerpaat najugaqartut soqutiginninngitsut, amerlanerussuteqartummi qisuariaateqanngimmata.

Inatsisartut peqqussutissaattut siunnersuutip suliarineqarnera pissutissaqalersitsivoq arlallit isumaliutersuuteqarfigineqarnissaannut, soorlu:


Kikkut siunnerfigineqarpat?

Attartortut tamarmik, imaluunniit innuttaasut ilaat aalajangersimasut qaffasinnerusunik ani-ngaasarsiortut taamaalillutillu aalaakkaasumik inissiaateqalernissaminnut ileqqaarsinnaasut aningaasalersuisinnaasullu siunnerfigineqassappat?


Kikkut inigisaminnik piserusuppat?

Ineqarnermut, Attaveqarnermut Pilersuinermullu Naalakkersuisoqarfiup Nuup Kommunia kajumissaarsimavaa attartortumi akornanni misissueqqullugu paasiniarlugit attartortut maannakkut inigisaminnik piserusunnerat aammalu attartortut ataasiakkaat aningaasatigut pisinnaasaannut naleqqiullugu piumasaqaatit suussanersut. Misissueqqusineq naammassineqanngilaq.


Pisariaqartitat suut naammassineqassappat?

Attartortut najugaqarnissaminnik pisariaqartitsinerat, imaluunniit taakku ileqqaarinissaminnik pisariaqartitsinerat? Imaluunniit inissianik piginnittut iluanaaruteqarnissaminnik pisariaqartitsinerat aningaasanilluunniit pissarsiniarnerat?


Akiusussaq qanoq ililluni aalajangersarneqassava?

Inissiaq naliminut tunineqassava, t.i. teknikikkut aningaasatigullu naliminut, imaluunniit piginnittup pissarsiarisinnaasaanut, t.i. niuernermi akiminut. Pisortat sianigissavaat inissiat niuernermi akiusunut tunineqarneratigut akiusussap nalinganiit qaffasinnerusinnaanera, taamaalillutik pisortat inissaaleqineq, namminneq pilersitseqataaffigisimasartik, iluanaaruteqarfigissavaat.


Attartortummi ineqarnermut aningaasaqarnerat?

Tunisinermi akiusup 60 %-ia aningaaserivimmit/aningaasalersuisarfimmit ukiuni 15-ini akilersugassanik taarsigassarsinikkut aningaasalersorneqartussaanera eqqarsaatigalugu inissiaq 80 m2-it missaanniittoq 1 mio. kr.-inik akilik ukiumi siullermi ilanngaatissat ilanngaatigereerlugit qaammammut 4.200 kr.-it missaannik akeqassaaq. Taakkununnga ilanngunneqassapput piginnittut peqatigiiffiannut ingerlatsinermullu aningaasartuutit qaammammut 1.100 kr.-it missaanniissangatinneqartut. Tassalu inissiamut 80 m2-mut qaammammut 5.300 kr.-it missaat.


Ineqarnermummi tapiissutit (isumannaallisaatit)?

Ineqarnermut tapiissutit attartortunuinnaq tapiissutigineqartarput, piginnittunut naamik. T.i. maannakkut attartortuusut ineqarnermut tapiissutisisartut inigisartik pisiarigunikku taakkunin-nga annaasaqassapput. Isertitarisakkat apparpata terminimullu akiliutissat akissaarunneqarpata inissiap pinngitsaaliissummik tuniniarneqarnissaa peratarsinnaavoq taamaalillunilu piginnittoq inissaarutissalluni matussuserneqanngitsunillu sinneruttunik akiitsoqarluni.

 

Aalajangersakkanut ataasiakkaanut nassuiaatit

 

§ 1-imut

Aalajangersakkap nassatarissavaa inissiaqarfiit attartortittakkanik inissiartallit suugaluartulluunniit pisortanit pigineqartut pigisatut inissianut allanngortinneqarsinnaanerat, ilaqutariinnut ataatsinut illuliat, illut marloqiusat imaluunniit ilaqutariinnut arlalinnut inissialiat imminnut atasunut ikinnerpaamik inissiatut pingasutut taaneqarsinnaasut, pineqaraluarpataluunniit. Illuni marloqiusani aamma ilaqutariinnut arlalinnut illuliani attartortutulli ilaqutariinnut ataatsinut illuliani attartortut attartukkaminnik pisinissaminnut inatsisitigut piumasaqaateqarsinnaanngillat. Ilaqutariinnut ataatsinut illulianik attartortut inigisamik pisiarinissaa taamaallaat qinnutigisinnaavaat.

Aalajangersakkap ilanngullugu nassatarissavaa inissiaqarfiit ataatsimit amerlanerusunik inissiartallit agguataarneqarnissaasa inissiallu allanngortinneqarnerisa ataatsikkut pinissaat. Inissianik piginnittuusut tassunga atatillugu akissaajaatit tamaasa siumoortumik tamatigut aningaasartuutigisussaavaat.

Aalajangersakkap nassataraa inissiap najugarineqanngitsup imaluunniit inissiaqarfiup najugarineqanngitsup tunineqarnerata peqqussummi pineqartunut ilaannginnera. Taamatut pisoqarnerani tamakku pisassapput niuernermi atugassarititaasut malillugit.

Aalajangersakkap nassataraa attartortup peqqussut malillugu pisinnaatitaaffeqarnissaanut pisussaaffeqarnissaanullu attartornermik isumaqatigiissummik atuuttumik attartortup pigisaqarnera apeqqutaammat. Attartortitsineq unitsinneqarsimappat imaluunniit attartornermik isumaqatigiissummik sumiginnaaneq pissutigalugu atorunnaarsinneqarsimappat inigisaminik pisinissaminut imaluunniit assersuutigalugu inissiamik allamik innersuunneqarnissaminut attartortoq pisinnaatitaanngilaq.

Aalajangersakkap nassatarissavaa inissiat sorliit peqqussummi pineqartunut ilaannginnissaat pillugu maleruagassanik Naalakkersuisut aalajangersaasinnaanerat. Matumani pingaarnertut eqqarsaatigineqarput inissiat atorfimmut atasumik pinngitsoorani najugassatut Namminersornerullutik Oqartussanit imaluunniit kommunalbestyrelsimit immikkoortinneqarsimasut taaneqarsinnaasulluunniit. Aalajangersagaq aamma atuutsinneqarsinnaavoq inissianut siunertanut aalajangersimasunut, immikkut inissisimasunut, immikkut oqaluttuassartalinnut, imaluunniit allanngutsaaliortariaqartunut allalluunniit patsisigalugit peqqussummi pineqartut avataanniittariaqartutut inniminnikkanut.


§ 2-mut

Aalajangersakkap nassataraa inissiaqarfimmi kommunalbestyrelsip inissiaatini attartortittakkat tuniniarniarlugit kissaatigiguniuk taava inissiaqarfimmi attartortut tamaasa inigisaminnik pisinissaannik allaganngorlugu neqerooruteqarfigissammagit.

Neqeroorutip attartortunut nassiutinnginnerani kommunalbestyelsip inissiaqarfik pigisatut inissiaqarfimmut tamakkiisumik inaarutaasumillu allanngortereersimassavaa. Tamatumunnga akissaajaatit kommunalbestyrelsimit siumoortumik aningaasartuutigineqassapput, tamatumali kingorna inissiat ataasiakkaat tunineqarnerminni akianut angissusertik malillugu ilanngunneqassallutik.

Attartortut inigisaminnik attartortittakkamik pisinissaminnik kissaatigisaqanngitsut inissiamik taamaaqataanik kommunalbestyrelsimit neqeroorfigineqassapput. Tamatuma nassataraa inissiamik allamik minnerpaamik taama pitsaatigisumik attartortup piumasaqaateqarsinnaatitaanera.

Pisinnaatitaaffik taanna attartortup attartukkaminiinnermini pigiinnassavaa. Qimatsilluni nuunnermut atatillugu akissaajaatit attartortup saniatigut allamit matussuserneqarsinnaanngillat, tassa qimatsilluni taamatut nuunneq nammineq kissaateqarnikkut nuunnermut nallersuunneqassammat. Inissiamut taamaaqataanut nuussinnaatitaanini attartortup atoruniuk attartukkamut nuuffigineqartumut attartornermik isumaqatigiissummik nutaamik isumaqatigiissuteqassaaq maleruagassallu sukkulluunniit atuuttut malillugit qularnaveeqqusiissut il.il. akilissallugit.


§ 3-mut

Aalajangersakkap nassataraa kommunalbestyrelsip inissiaatiminik attartortittakkanik tuniniaaniarluni aalajangersimasup agguataarereersimanissaa, ileqqoreqqusanik pisariaqartunik piginnittullu peqatigiiffiannut missingiutinik suliarinnereersimanissaa, aammataaq kommunalbestyrelsip neqeroorutaata imarissavaa pisussaaffeqarluni tunisinissamik neqeroorut.

Aalajangersakkap ilanngullugu nassataraa kommunalbestyrelsip peqqusersuitsumik pissuseqarnissaa aammalu inissiaqarfiup pineqartup tunineqarnissaanut pilersaarutip pitsaasorujussuaaneraanermik imaluunniit paasissutissanik eqqunngitsunik imaqartinneqannginnissaa.

Ilanngullugu aalajangersakkap nassataraa attartortup ilanngaaserneqanngitsumik ilanngaatissallu ilanngaatigereerlugit maannakkut ineqarnermut akiliutaasa aammalu ilanngaaserneqanngitsumik ilanngaatissallu ilanngaatigereerlugit siunissami akiliutissaasa naatsorsorneqarnerat kommunalbestyrelsip ilanngutissammagit. Matumani kommunalbestyrelsip immikkut sianiginiassavai aningaasat nikerarnerisa eqqortuunerat aammalu pissusiviusoq una; attartortut ikittuinnaat akileraarusiinikkut ilanngaatit nalinginnaat kisimiittunut 8.000 kr.-iusut aappariinnullu 16.000 kr.-iusut atortarmatigit.

Eqqortumik paasissutissiinissamut pisussaaffik takussutissinniarlugu ineqarnermut akiliutit ineqarnermullu aningaasartuutit naatsorsorneqarnerat ima pisinnaavoq:

Inoqutigiit tassaasut ataataq, anaanaq meeqqallu marluk sisamanik arfineq-marlunnillu ukiullit inissiami pisortat inissiaqarfiutaanni attartortittakkami Nuup Kommuniata pigisaani 1998-imi Fiskerbymi sananeqartumi najugaqarput. Inissiaq quleriiuvoq sisamanik initalik 90 m2-iullunilu.

Inoqutigiit qaammammut aningaasat isertitaat tamarmiusut 29.958 kr.-iupput, taakkulu akileraaruteqaataasussamik qaammammut aningaasat isertitanut 28.625 kr.-inut naapertuupput. Naatsorsuutigaarput akileraarusiinikkut ilanngaatit nalinginnaat inoqutigiit atorsimanngikkaat.


Pisortat inissiaataanni attartortittakkami inoqutigiit ineqarnermut akiliutaat, ineqarnermut akiliutit iluarsaanneqarnerat sioqqullugu kingoqqullugulu

 

Ineqarnermut akissaajaatit qaammammut 1. januar 2002 sioqqullugu
Aningaasaliissutinit iluanaarutit 1.252
Ingerlatsinermut aserfallatsaaliuinermullu akileeqataassutit 2.118
Ineqarnermut akiliutit tamarmiusut 3.370
Ineqarnermut meeqqanut tapiissutit 2*10 % - 674
Ineqarnermut tapiissutit (isumannaarutit) 28 % 0
Ilanngaatissat ilanngaatigereerlugit ineqarnermut akiliutit 2.696
Kiassarnermut akiliutaagallartut 610
Innaallagissamut akiliutaagallartut 740
Qaammammut ataatsimut katillugit 4.046

 

Ineqarnermut akissaajaatit qaammammut 1. januar 2002 kingorna
Aningaasaliissutinit iluanaarutit 1.405
Ingerlatsinermut aserfallatsaaliuinermullu akileeqataassutit 1.847
Ineqarnermut akiliutit tamarmiusut 3.252
Ineqarnermut meeqqanut tapiissutit 2*10 % 0
Ineqarnermut tapiissutit (isumannaarutit) 28 % - 911
Ilanngaatissat ilanngaatigereerlugit ineqarnermut akiliutit 2.341
Kiassarnermut akiliutaagallartut 610
Innaallagissamut akiliutaagallartut 740
Qaammammut ataatsimut katillugit 3.691


Ineqarnermut akissaajaatit, tassaasut ineqarnermut akiliutit, kiassarnermut innaallagissamullu akiliutaagallartut, qaammammoortut ineqarnermut akiliutit iluarsaanneqarnerisigut qaammammut 4.046 kr.-iniit 3.691 kr.-inut apparput. Oqaatigineqassaaq inoqutigiit ineqarnermut tapiissutinik (isumannaarutinik) pissarsisinnaatitaasut ukiumoortumik isertitaat tamarmiusut 369.496 kr.-iugaluartut.

Inoqutigiit attartortutut attartornerup nalaani inigisami aserfallatsaaliuinermut ingerlaavartumut pisariaqartumullu, tassa iikkat qilaallu qalipannerinut naqqillu lakernerinut, aningaasartuutit akilertassavaat. Ineqarnermut akiliutitigut akileqquneqassapput inissiamik piginnittup ingerlatsinermut, ingerlaavartumik aserfallatsaaliuinermut siunissamilu iluarsaassisarnissanut aningaasartuutinut matussutissaanut akileeqataassutissat.


Inissiaq pigisatut inissiamut allanngortinneqarpoq

Inoqutigiit neqeroorfigineqarsimapput inissiaq attartortittagaq najugarisartik pigisatut inissian-ngorlugu pisiareqqullugu. Tuninerani m2-mut ataatsimut akiliutissaq 12.751 kr.-inut aalajangersarneqarsimavoq imaluunniit katillugit 1.156.000 kr.-it missaannut. Taakku 40 %-ii imaluunniit 462.000 kr.-it missaanniittut aningaasalersorneqassapput ernialersugaanatillu akilersugassaanngitsunik pisortat taarsigassarsiarititaannik ukiuni 15-ini akilersugassatut. 60 %-ii, imaluunniit 694.000 kr.-it missaat, inoqutigiinnit inissiamik pisisunit akilerneqassapput.

Inoqutigiit inissiamik piginnittutut qaammammut ineqarnermut akiliutissaat naatsorsorneqassapput. Assersuut A-mi inoqutigiit initaarnissamut atugassanik ileqqaagaqarsimanngillat, taamaattumik pisinermi akiliutissat 60 %-ii aningaasalersorneqassapput aningaasalersuisarfimmit taarsigassarsinikkut 7,8 %-imik ernialikkanik ukiunilu 15-ini akilersugassanik.

Assersuut B-mi inoqutigiit nammineq akiliutissat 10 %-iusut, 115.600 kr.-inut naapertuuttut, matussutissaat initaarnissamut atugassanik ileqqaaruteqarfigisimavaat. Sinneruttut 50 % ani-ngaasalersorneqassapput aningaasalersuisarfimmit taarsigassarsinikkut 7,8 %-imik ernialikkanik ukiunilu 15-ini akilersugassanik.

 

Ineqarnermut akiliutit qaammammoortut Assersuut A
Aningaasalersuisarfimmut akiliutit 6.628
Ernianut aningaasartuutit ilanngaataasa nalingat (ukioq siulleq) -1.285
Ingerlatsinermut akileeqataassutit 755
Ineqarnermut akiliutit tamarmiusut 6.098
Kiassarnermut akiliutaagallartut 610
Innaallagissamut akiliutaagallartut 740
Qaammammut ataatsimut katillugit 7.448

 

Ineqarnermut akiliutit qaammammoortut Assersuut B
Aningaasalersuisarfimmut akiliutit 5.523
Ernianut aningaasartuutit ilanngaataasa nalingat (ukioq siulleq) - 983
Ingerlatsinermut akileeqataassutit 755
Ineqarnermut akiliutit tamarmiusut 5.295
Kiassarnermut akiliutaagallartut 610
Innaallagissamut akiliutaagallartut 740
Qaammammut ataatsimut katillugit 6.645


Inoqutigiit maannakkut akilertalerpaat aningaasalersuisarfimmit taarsigassarsianut akiliutissat, ernianullu akissaajaatit akileraarusiinikkut ilanngaatinit amerlanerusut akiliutissanut aningaasat atorneqartunut apparsaataapput. Ernianut aningaasartuutit ilanngaataasa nalingat pitsaaqummut tassunga takussutissaavoq.

Qaammammoortumik ineqarnermut akissaajaatit tassaasut aningaasalersuisarfimmit taarsigassarsianut ilanngaatissat ilanngaatigereerlugit akiliutit aamma kiassarnermut innaallagissamullu akiliutaagallartut, inissiap attartortittakkamiit pigisatut inissianngortillugu allanngortinneqarneratigut assersuut A-mi 7.448 kr.-inut assersuut B-milu 6.645 kr.-inut qaffapput.

Attartortoq assiginagu inoqutigiit piginnittutut inigisap iluata aserfallatsaaliorneqarneranut tamakkiisumik akisussaalerput. Tamatuma saniatigut inissiaqarfiup tamarmiusup aserfallatsaaliugaaneranut inoqutigiit peqataassapput. Tamatumani nalinginnaasumik pisariaqarpoq m2-mut ataatsimut ukiumut 60-70 kr.-it atorneqarnissaat qaammammut 500 kr.-it missaannut naapertuuttut, taakku siunissami aserfallatsaaliuinissanut pilersaarutaasunut aningaasaateqarfimmut ataatsimoorussamut toqqorneqartassapput. Taamaattumik assersuutigalugu qaliaq taarsertariaqalersimappat siunertamullu tassunga toqqortuisoqarsimanngippat taamaaliornissaq inoqutigiinnut akisoorujussuulersinnaavoq.

Inoqutigiit pigisatut inissiaq aqqutigalugu ileqqaagaqalissapput, taakkuli inoqutigiit aatsaat iluaqutigilersinnaavaat inissiaq tunigunikku. Taamaattumik ileqqaarutit taakku tassaanngillat ulluinnarni inuunermi atorneqarsinnaasut.

Taamaammat inoqutigiit qaammammut 3.691 kr.-inik akiliuteqartarlutik attartortuuinnarsinnaapput imaluunniit piginnittuulersinnaallutik qaammammut 7.448 kr.-it tikillugit akiliuteqartarlutik. Attartortuunermut naleqqiullugu nikingassut qaammammut 3.757 kr.-it tungaanoorpoq.

Taamaattumik ilisimasaqartutut inoqutigiinnut siunnersuut mannaasinnaavoq: Inoqutigiit qaammammut 3.757 kr.-inik aningaasartuuteqarnerunissaq akissaqartikkunikku attartortuuinnarsinnaapput qaammatillu tamaasa 3.757 kr.-it taakku akileraarutitigut oqilisaaffiusumik Nanoq konto initaarnissamut ileqqaaruteqarfimmut nakkartittarsinnaallugit. Ukiut 10 qaangiunnerini taakku 685.000 kr.-iulersimassapput 8 %-inik ernialerneqartussat.

Aalajangersakkami siunertaavoq tamakkiisumik paasisinneqarneq tunngavigalugu attartortup pisinissaminik aalajangiussisinnaanissaata qularnaarneqarnissaa. Nalornissutissaqanngilluinnartariaqarpoq, tassami attartortup aalajangernera allanngortinneqarsinnaanngimmat. Attartortup pisinini kingusinnerusukkut peqqissimissutigilersinnaanngilaa. Inissiamik pisinissamik aalaja-ngerneq suliffissaaleqilernikkut imaluunniit sulisinnaajunnaarnikkut inoqutigiit aningaasaqarniarnerannut ineqarniarnerannullu ilungersunartunik kinguneqarsinnaavoq.


§ 4-mut

Aalajangersakkap kingunerissavaa attartortup inigisaminik pisiumanngitsup maannamut pisinnaatitaaffini pigiinnassagai. Attartortoq imatut inissisimassaaq soorlulusooq allanngortoqarsimanngitsoq. Namminersornerullutik Oqartussat kommunillu inissiaataat attartortittakkat najugaqaqatigiiffinnut agguarneqassapput aningaasatigut nammineersinnaanngorlugit attartortullu najugaqaqatigiiffinni ataasiakkaani najugaqartut najugaqaqatigiiffiup ingerlanneqarneranut sunniuteqaqataasinnaatitaapput.

Inissiaqarfimmi pisortanit pigineqartumi ineqarnermut akiliummiissapput piginnittup aningaasaliissutigisaminit iluanaarutissai kiisalu najugaqaqatigiiffiup ingerlanneranut akileeqataassut, tamatumani ilanngullugit ataavartumik aserfallatsaaliinissaq piffissanilu aalajangersimasuni aserfallatsaaliinissanut pilersaarutaasunut unerartitsinissaq.

Namminersornerullutik Oqartussat kommunillu inissiaataanni attartortittakkani piginnittoq pisussaavoq inissiaqarfiup attartukkallu isumannaatsumik aserfallatsaalisimanissaat isumagissallugu. Teknikikkut atortorissaarutit, kuuffiit, kiassarneq, innaallagiaq imeqarnerlu pitsaasuussapput atorluarsinnaallutillu. Taamatuttaaq illumik piginnittoq pisussaavoq kallerup innerata ikkuffii, iikkanut qalliutit, matserfiit, radiatorinut, ruujorit, skaaviit aalajangikkat, illup iluani atortut il.il. aserfallatsaalissallugit.

Ineqarnermut akiliutissap naatsorsorneqartarnissaanut tunngatillugu pisortat pigisatut inissiaataat, sulilu attartortitaasut, ingerlatsinikkut najugaqaqatigiiffiup sumiiffigisaanut ataannassapput, aammalu ingerlatsineq aserfallatsaaliinerlu najugaqaqatigiiffiup taassuma aningaasartuutai tunngavigalugit naatsorsorneqassapput.

Assersuut: Najugaqaqatigiiffimmi X-imiipput inissiaqarfiit tallimat katillugit 400-nik inissiartallit. Inissiaqarfiit ilaat ataaseq 80-inik inissiartalik immikkoortiterneqarsimavoq namminerisamik pigisassanngortiterlugu. Inissiaqarfimmi tassani 45-t suli attartortuupput. Najugaqaqatigiiffiup X-ip aalajangersimavaa eqqiluitsuutitsinissaq aputaajaasarnissarlu aalajangersimasumik pitsaassuseqassasut, tamatumunngalu aningaasartuutit matussutissaannik ingerlatsinermut aningaasaatit qaffanneqarnissaat akuerisimallugu. Attartortut 45-t inissiaqarfimmi agguarneqarsimasumi allatullu pigisassanngortitaasumi najugaqartut aamma taamatut sullinneqartussaapput.

Inissiaqarfimmi piginnittut 36-t, inuit piginnittut ataasiakkaat 35-t kiisalu kommunalbestyrelsi ataaseq inissianik tunineqarsimanngitsunik 45-nik piginnittoq, inissiaqarfimmut aaqqissuussamik allamik aalajangiisimasinnaapput. Pissutsit taamaattut attartortunut attuumassuteqanngillat, kommunalbestyrelsip tamatumunnga atatillugu aningaasartuutit piginnittut peqatigiiffiannut akilertussaammagit. Kommunalbestyrelsip piginnittut peqatigiiffiannut aningaasartuutai najugaqaqatigiiffimmut X-imut attuumassuteqanngillat, kommunalbestyrelsillu aningaasartuutit attartortunut tutsissinnaanngilai.


§ 5-imut

Aalajangersakkami nammineq inigisamik pisinissamik soqutiginninneq attartortuninngaanneeraangat qanoq iliortoqartarnissaa pineqarpoq. Aalajangersakkami piumasaqaataavoq ilaqutariinnut arlalinnut illuliat inissiat pingasut ataatsimoortillugit sanaat aatsaat pisiarineqarsinnaasut attartortut ikinnerpaamik 2/3-iisa inigisaminnik pisinissartik kissaatigippassuk. Ilaqutariinnut arlalinnut illuliat sisamanik amerlanernilluunniit inissiartallit aatsaat pisiarineqarsinnaapput attartortut ikinnerpaamik 3/4-iisa inigisaminnik pisinissartik kissaatigippassuk.

Aalajangersakkami piumasaqaataavoq inissiaqarfiit tamarmiusut allanngortinneqassasut, inissiaqarfimmilu attartortut tamarmik inissiaminnik pisinissaminnik neqeroorfigineqassapput. Aalajangersakkap kinguneraattaaq, attartortut ikinnerussuteqartut inissiaqarfimmi inissiaminnik piginissaminnik kissaateqanngitsut inissiaqarfiup piginnittuanit inissiat taamaaqataannik neqeroorfigineqassasut. Pigisatut inissiat sinneruttut maannamut attartortunit inigineqartut, najugaqaqatigiiffimmi inissiaqarfiup sumiiffigisaanut ataannassapput, aammalu ingerlatsineq aserfallatsaaliinerlu najugaqaqatigiiffiup taassuma aningaasartuutai tunngavigalugit naatsorsorne-qartassapput.


§ 6-imut

Aajangersakkap kinguneraa attartortut inigisaminnik piserusuttut inissiaqarfiup piginnittuanut saaffiginnitsinnatik eqqarsaatersoqqaarsimassasut minnerpaamillu piginnittut peqatigiiffissaata malittarisassaanut missingersuutit suliarereersimassagaat, kiisalu attartortut nammineq pisiap akiata ilaanut akiligassaminnut akissaqarnerannut uppernarsaat suliarereersimassagaat.


§ 7-imut

Aalajangersakkap kinguneraa kommunalbestyrelsi inissiaatiminik attartortittakkanik attartortunut tunisaqaraluarpalluunniit imaluunniit inissiaqarfimmi attartortittakkami attartortut piumasaqaatigineqartutut amerlanerussutillit inissiamik attartukkamik pisiarinissaat siunertaralugu kommunalbestyrelsimut imaluunniit Namminersornerullutik Oqartussanut saaffiginnikkaluarpata inissiamik piginnittoq inissiaqarfik pillugu pissutsit assigiinngitsut pillugit paasissutissat pineqartut tamaasa tunniutissavai. Paasissutissaat attuumassuteqartut tutsuiviginartullu kisimik saqqummiunneqarsinnaapput.

Aalajangersakkap kinguneraa illuutinik nioqquteqartartup inissiap nalinga tamanullu ammasumik tunineqaruni akigissangatinneqartoq naatsorsussagai. Inissiap nalinga tunisinermilu akigissangatinneqartoq naapertuutinngippata, amerlassutsini taakkunani marlunni qaffasinnerpaaq inissiap nioqqutigineqarnermini nalingatut isigineqassaaq.

Inissiaqarfik attartortunut aningaasarissaartuunngitsunut tunineqarpat, attartortullu taakkua inissiaqarfik iluarsartariaqavissoq tigusimappassuk, tamanna iluarsaassinissap kinguartinneqarluniluunniit ingerlanneqanngitsoornissaanut aarlerinartoqarsinnaavoq.

Tamatuma peqatigisaanik aarlerinaateqarsinnaavoq piginnittut amerlanerussuteqartut iluarsaassinissaq pinngitsaalissutigissappassuk ikinnerussuteqartut inigisartik tunisariaqalersinnaagaat aningaasaqarnertik ima ilungersunartigimmat iluarsaassinissamut peqataanissaminnut akissaqaratik.


§ 8-mut

Aalajangersakkap kinguneraa Naalakkersuisut imaluunniit kommunalbestyrelsi attartortup inigisaminik pisineranut atatillugu attartortoq pisiap akiata 40 %-ianik taarsigassarsisissinnaagaat, ukiuni 15-ini erniaqanngitsutut taarsersugassaanngitsutullu ilusilerlugit. Pingaaruteqarpoq malugissallugu aningaasanngorlugit taarsigassarsisitsineq pineqanngimmat, taamaallaalli akiligassat uninngatinneqarlutik.

Taarsigassarsisitsinermi piumasaqaataavoq attartortup pisiap akiata 60 %-ii sinneruttut nammineq akilersinnaassagai, assersuutigalugu nammineq aningaasanngorlugu akiliinermigut aamma pigisanik aalaakkaasunik qularnaveeqqusilluni taarsigassarsisitsisarfimmit, aningaaserivimmit allamiluunniit taarsigassarsianit aningaasaliinermigut. Aalajangersakkap nassataraattaaq Naalakkersuisut kommunalbestyrelsiluunniit pisiap akiata sinneranut aningaasalersueqataasinnaanngitsut.

Pisiap akianut ilaassapput aningaasartuutit inissiat allatut pigisassanngortinnerannut tunineqarnerannullu tunngasut. Aalajangersakkap nassataraattaaq pisiap akiata aalajangersarneranut tunngaviussammat inissiaqarfiup teknikikkut aningaasatigullu nalinga. Taamaalilluni inissaaleqinerup inissiaqarfiup akianut sunniuteqarsinnaanera pinngitsoorneqassaaq.

Inissiaqarfiup landinspektørimit uuttortarneqarneranut, teknikikkut aningaasaqarnikkulluunniit siunnersorneqarnermut tunisinermullu atatillugu aningaasartuutit akianut tamarmiusumut ilaatinneqassapput. Naatsorsuutigineqarpoq inissiaqarfik immikkoortiterneqarsimassasoq, taamaalilluni inissiap ataatsip inissiaqarfimmut tamarmiusumut peqataassutaat inigisap ataatsip peqataassutaanut naapertuuttunngorlugu.


§ 9-mut

Aalajangersakkap kinguneraa Naalakkersuisut imaluunniit kommunalbestyrelsip taarsigassarsiarititaat isumannaarneqassasut inissiap qularnaveeqqusiunneratigut. Qularnaveeqqusiussat pisisup pisinermi akiliutaasussat sinnerinik aningaasalersuineranut atatillugu pisisup taarsigassarsiarisinnaasaanit salliutinneqassapput. Naalakkersuisut imaluunniit kommunalbestyrelsip taarsigassarsiarititaat pisinissamik isumaqatigiissutip atsiorneqarfiata ulluanit ukiuni 15-ini ernialersugassaanatillu akilersugassaanngillat, tamatumalu kingorna ukiut qulit ingerlaneranni akilersorneqassallutik.

Aalajangersakkap kinguneraattaaq ukiuni siullerni 15-ini ukiunilu tulliuttuni qulini piginnittut nikinneranni taarsigassarsiat akilerneqartussanngussasut, taarsigassarsisitsisoq allamik aalajangiisimanngippat. Aammattaaq taarsigassarsiat akilerneqartussanngussapput, piffissap akilersuiffiusup aallartereernerata kingorna erniat akilersuutillu piffissaq eqqorlugu akilerneqarsimanngippata, imaluunniit qularnaveeqqut aserfallatsaalineqanngippat, taamaalilluni taarsigassarsisitsisup isumannaarutaanut nalikillissutaalluni.


§ 10-mut

Aalajangersakkap kinguneraa Naalakkersuisut imaluunniit kommunalbestyrelsi aatsaat taarsigassarsisitsisinnaalissasut pisisup nammineq akileeqataasinnaanini uppernarsaaserpagu aningaaserivimmi uninngatitaqarnermigut, aningaaserivimmit qularnaveeqquserneqarnermigut imaluunniit realkreditimit akuerineqarnermigut. Taamaalilluni taarsigassarsisitsisartut tamatuminnga suliaqavissut pisisussap akiliisinnaassusianik nalileereersimanissaat qulakkeerneqassaaq.


§ 11-mut

Aalajangersakkakkut iluanaarniapilunnissaq pinngitsoortinniarneqarpoq, assersuutigalugu inissaaleqineq tamanut ammasumik tunisinikkut akimik qaffasinnerusumik kinguneqarpat, naak attartortup teknikikkut aningaasatigullu naliliineq malillugu inissiaq akikinnerusumik pisiarisinnaagaluaraa.

Aalajangersakkap kinguneraa niuernermi akiusinnaasoq pillugu naliliineq teknikikkut aningaasatigullu naleqassutsimit 5 %-it sinnerlugit qaffasinneruppat, pisisup Naalakkersuisut imaluunniit kommunalbestyrelsi aningaasasat nalingisa nikerarnerat malillugu qularnaveeqqusissagai.

Inissiap niuernikkut akiusoq inissiap sananeqaqqinnerani akianit qaffasinnerungaatsiarpat, inissiarlu aki qaffasinnerungaatsiartoq taanna atorlugu attartortunut neqeroorutigineqarpat, annilanngatigineqarsinnaavoq attartortut ikittuinnaat kisimik inissiaminnik pisinissaminnut akissaqassasut. Attartortut amerlanerit ineqarnissamik pisariaqartitsinerat pissutigalugu aningaasat nalingisa nikeqarnerat malillugu qularnaveeqqusiissummit iluanaarutaasinnaasut aatsaat tunisinikkut piviusunngortinneqarsinnaassapput.

Assersuut: Inissiaq 90 m2-isut angitigisoq teknikikkut aningaasaqarnikkullu 1.156.000 kr.-inik naleqarpoq, inigisaminilu tassani teknikikkut aningaasaqarnikkullu nalinga taanna atorlugu sananeqaqqinneqarsinnaalluni. Inissiap niuernikkut nalinga 1.350.000 kr.-iuvoq. Taamaalilluni assigiinngissut 194.000 kr.-iuvoq, 16,8 %-inut naapertuuttoq. Niuernikkut nalinga inigisani illunik tuniniaasartumit naliliissutit kingulliit kiisalu inissiap pineqartup nalilernerneqarnera aallaavigalugit missingerneqarsimavoq.

Pigisatut inissianik niuerneq ukiuni qulini tulliuttuni allannguuteqassanngippat, ukiumoortumik iluanaarutaasinnaasut aningaasat nalingisa nikerarnerat malillugu qularnaveeqqusiissutit 1/10-iannik amerlassuseqassapput, t.i. 19.400 kr.-it, taakka aatsaat inissiap tuninerani piviusunngortinneqarsinnaallutik. Iluanaarutit taamaattut ullumikkut nalingat 5 %-imik ernialerlugu 149.801 kr.-iuvoq.

Attartortup inissiamik attartukkamik pisinermigut aningaasaqarnikkut nalinginnaasumik annaasinnaasai, kiisalu pigisatut inissiat niuernikkut akiisa apparatarsinnaanerat eqqarsaatigalugit Naalakkersuisut isumaqarput nunatsinni sumiiffinni arlalinni inissaaleqinerujussuup atornerlunneqarnissaa Naalakkersuisut nalinginnaasumik suleriaasiannut naapertuuttuunngitsoq.

Aningaasat nalingisa nikerarnerat malillugu qularnaveeqqusiissut Nunatta Eqqartuussiviani nalunaarsuiffimmi inissiat inissiaqarfiillu pingaarnerit quppernerini pisussaaffittut qularnaveeqqusigassatullu nalunaarsorneqassaaq, aammalu piginnittut nikinnerani akilerneqartussanngorluni, taamaattorli tamanna pissanani inissiaq kingornunneqarpat, tassami piginnittut nikinneranni piginneqataasumut, aapparisamut, aapparisatut nalunaarsukkamik inooqatigisamut, kingornussisussanut imaluunniit inooqatigisanut ukiut kingulliit marluk aappariinnermut assingusumik inuit allattorsimaffianni nalunaarsorneqarsimasumik inooqatigisimasanut tunniussineq piginnittut nikinnerattut isigineqanngimmat.

Aningaasat nalingisa nikerarnerat malillugu qularnaveeqqusiissut maannakkorpiaq naleqassutsimik missingiineruvoq, tunisisumit akilerneqartussaanngitsoq, piffissalli ingerlanerani nalikillisinneqartussaq tunniunneqartussarluunniit. Tamatuma akerlianik § 9 malillugu taarsigassarsiat ima akilersorneqassapput, tunisisup piffissap ingerlanerani pisassani pissarsiarissallugit. Taamaattumik § 11-imi § 9-milu piginnittut nikinnerat assigiimmik nassuiarneqanngilaq.

Aalajangersakkap kinguneraa aningaasat nalingisa nikerarnerat malillugu qularnaveeqqusiissut amerlaqatigiikkuutaarlugu ukiut qulit ingerlaneranni nalikillisinneqassammat ullormit pisinissamut isumaqatigiissutip atsiorneqarfianiit.

Aalajangersakkap kinguneraa Naalakkersuisut allaffissornikkut aalajangersagaliorsinnaasut aningaasat nalingisa nikerarnerat malillugu qularnaveeqqusiissutit isumakkeerneqarnissaannut. Tamatumani pingaartumik eqqarsaatigineqarpoq ajutoorujussuarnermik taaneqarsinnaasumik pisoqarnera, tassa illunik nioqquteqarnermi akit appariartuinnarnerat. Piginnittup toquneratigut aningaasat tunniunneqarpata, aammalu tuninerani akip qularnaveeqqut matusinnaanngippagu apeqqutaalissaartaaq tuninera akisuallaarnersoq, imaluunniit aningaasat nalingisa nikerarnerat malillugu qularnaveeqqusiineq qaffasippallaarnersoq, taamaattumillu isumakkeerneqartariaqarluni.

Aningaasat nalingisa nikerarnerat malillugu qularnaveeqqusiissutip isumakkeerneqarnissaata nalilersorneqarnerani siunertaavoq, illumik tunisinermi pissutsit naatsorsuutigineqartarnissaat, tamatumani ilanngullugit tunisinermi akigititat niuernermi akinit appasinnerunersut, imaluunniit iluanaarniapilulluni niuertoqarnersoq. Pingaartumik qinnuteqartup akissaqassusiani pisunut nutaanut tunngasut, inuussutissarsiorsinnaassusia kiisalu ilaqutariinnermi allannguutit inissiamik tunisinermut ersarissaataasinnaapput.


§ 12-imut

Aalajangersakkap kinguneraa pigisatut inissiat tamarmik sutigut tamatigut nammineq aalaakkaasumik pigisatut isigineqassasut. Aalajangersagaq taamaallaat pingaaruteqarpoq pigisatut inissiat marluk arlallilluunniit imminnut atasuugaangata.

Aalajangersakkamittaaq aalajangersarneqarpoq pigisatut inissiamik piginnittup pisariaqartillugu inigisaminut isertoqarnissaa akuerissagaa atortorissaarutit ataatsimoorussat misissorneqarnissaannut, iluarsaassisoqarnissaanut imaluunniit assersuutigalugu inigisap qanoq issusia nalunaarusiorniarlugu imaluunniit ingerlatsinermut aserfallatsaaliinermullu pilersaarutit suliarineqarnissaannut tamanna pisariaqartinneqarpat. Iserfigineqarnissaq sioqqullugu piginnittut peqatigiiffiata inissiamik piginnittut ataasiakkaat naammaginartumik sioqqutsilluni ilimasaartassavai.


§ 13-imut

Aalajangersakkap kinguneraa inissiap illutaata saniatigut piginnittoq aamma inissiaqarfiup ataatsimoorussartaanut piginneqataavoq, taamaalilluni taakkununnga aningaasatigut tapeeqataasarnissaminut pisussaaffeqarluni. Inissiat ataasiakkaat akornanni pissutsit aalajangersarneqassapput agguaassinermi kisitsisit tunngavigalugit, imaluunniit inissiat ataasiakkaat naligiissinnerisigut.


§ 14-imut

Aalajangersakkap kinguneraa ataatsimeersuarneq piginnittut peqatigiiffiani oqartussaanerpaasoq, taamalu peqatigiiffimmut ingerlanneranullu tunngasut suulluunniit suliarisinnaallugit. Oqaatigineqassaaq ataatsimeersuarnermi aalajangikkat piginnittut amerlassusiat malillugu amerlanerussuteqarnikkut aalajangerneqartassammata, agguaassinermi kisitsisit tunngaviginagit. Taamaalillunilu qulakkeerniarneqarpoq piginnittut tamarmik naligiissasut, qanorluunniit angitigisumik pigisaqarnerat apeqqutaatinnagu.

Piginnittoq taasinermik ataatsimik naleqarpoq, qanorluunniit inissiaqarfimmi inissiaq ataaseq amerlanerusulluunniit pigigaluarunigit, assersuutigalugu kommunalbestyrelsi. Tamatumani qulakkeerniarneqarpoq assersuutigalugu kommunalbestyrelsip agguataarerujoorluni periaaseqarnermigut amerlanerussuteqartuannginnissaa, taamaalillunilu piginnittut peqatigiiffianni siunnersuutit tapersersinnaallugit itigartissinnaallugilluunniit, kommunimi politikkikkut kommunillu aningaasaqarneratigut pissutsit aallaavigalugit.

Akerlianik aalajangersakkap kinguneraa, kommuni inissianit 80-init marlunnik tunisaqarnermigut piginnittunut allanut marlunnut sanilliullugu ikinnerussuteqassaaq. Taamaattumik kommuni inissiaqarfimmik nammineq pigisassanngortitsissanngilaq, aatsaalli attartortut affaat inissiaminnik tiguserusullutik naammaginartumik soqutiginnippata. Taamaattoqanngippat assersuutigalugu inissiamik piginnittut taakku marluk piginnittut peqatigiiffiata ataatsimeersuarnerani amerlanerussuteqassapput, taamaalillutillu piginnittut peqatigiiffiannut tamarmut aalajangiisunngorlutik. Taamaattumik kommunip peqqissaartumik isumaliutigisariaqarpaa inissianik tunisiartuaarnermut imaluunniit inissiat ataasiakkaarlugit tuninerannut atasumik aningaasaqarnikkut annaasaqariataarusunnerluni allaffissornikkulluunniit ajornartorsiuteqarniarnerluni.


§ 15-imut

Aalajangersakkap kinguneraa ataatsimeersuartut siulersuisunik qinersissasut. Oqaatigineqassaaq kommunalbestyrelsi imaluunniit Naalakkersuisut siulersuisunut qinigaasinnaanngimmata. Tamatuma kinguneraa piginnittorpiaat inissiaqarfimmi najugaqartut kisimik qinerneqarsinnaammata. Taamaalilluni qulakkeerniarneqarpoq siulersuisut inissiaqarfimmut ulluinnarnilu ingerlanneqarneranut qanimut attaveqarnissaat.

Ulluinnarni ingerlatsineq tamaat siulersuisut isumagisussaavaat, piginnittullu ataasiakkaat tamatumunnga tapiissutinik akiliisussaatitaapput. Aammattaaq siulersuisut ulluinnarni naatsorsuutit naatsorsorneqartarnissaat isumagisassaraat. Siulersuisut suliassaminnut avataaniit aqutsisussamik pissarsisinnaapput. Siulersuisut aqutsisoq avataaneersoq allaganngorlugu immikkuualuttortaalu ilanngullugit isumaqatigiissuteqarfigisariaqarpaat, nakkutigissallugulu pineqartup suliassani isumannaatsumik suliarisinnaagai. Aammattaaq siulersuisut piumasarisariaqarpaat aqutsisoq avataaneersoq naammaginartumik akisussaanermut sillimmateqassasoq.


§ 16-imut

Aalajangersakkap kinguneraa piginnittut peqatigiiffiata naatsorsuutai kukkunersiuisumit naalagaaffimmit akuerisamit kukkunersiuisumilluunniit nalunaarsugaasumit suliarineqassasut. Kukkunersiuisup kukkunersiuinermut tunngatillugu atortariaqakkat tamaasa takussavai. Kukkunersiuisup ukiumoortumik nalunaaruteqarnermini peqatigiiffiup suleriaasii tutsuiginartuunersut.

Aalajangersakkami siulersuisunut ilaasortat ataasiakkaat piumaffigineqarput atsiugassat kukkunersiuisup nalunaarutaaniittut tamaasa ilisimalersimallugit.


§ 17-imut

Aalajangersakkap kinguneraa piginnittut peqatigiiffiat §§ 13-16-imi pissutsinik pineqartunik imalinnik malittarisassaliorsimanngikkaluarpalluunniit, malittarisassallu inissiaqarfiup pigisatut inissiaataasa ataasiakkaat pisussaaffigisatut nalunaarsortissimallugit, §§ 13-16 maliinnarneqassapput.


§ 18-imut

Siunnersuutigineqarpoq peqqussut 1. juli 2002 atuutilissasoq.